Կառլեն Հովհաննիսյանը վերադարձել է «Փյունիկ»

Զինծառայության ավարտից հետո «Փյունիկ» ՖԱ է վերադարձել 20-ամյա կիսապաշտպան Կառլեն Հովհաննիսյանը։ Հայտնում է ակումբի մամուլի ծառայությունը:

Կառլենը «Փյունիկի» ակադեմիայի սան է. 2021/22 թթ. մրցաշրջանում «Փյունիկ-05»-ի հետ դարձել է Հայաստանի մինչև 18 տարեկանների առաջնության հաղթող։ Նույն մրցաշրջանում Կառլեն Հովհաննիսյանը սկսել է հանդես գալ Հայաստանի Առաջին խմբում ելույթ ունեցող «Փյունիկ Ակադեմիայում»։

2022 թվականի մայիսի 28-ին, Հայաստանի Պրեմիեր լիգայի առաջնության վերջին տուրի՝ Երևանի «Ալաշկերտի» դեմ (1:1) խաղում, Կառլենն իր նորամուտն է նշել «Փյունիկի» գլխավոր թիմում, որը դրանից մեկ տուր առաջ 15-րդ անգամ հռչակվել էր Հայաստանի չեմպիոն։

2022 թվականի աշնանը նա «Փյունիկի» մինչև 18 տարեկանների թիմի կազմում մասնակցել է Երիտասարդական Չեմպիոնների լիգայի 2022/23 թթ. խաղարկության առաջին փուլի՝ ֆրանսիական «Նանտի» հետ հանդիպումներին։

2023 թվականի հուլիսին Կառլենը տեղափոխվել է ԲԿՄԱ, որտեղ զինծառայության ընթացքում խաղացել է նախորդ երկու մրցաշրջաններում։ Ընդհանուր առմամբ, նա բանակայինների կազմում անցկացրել է 53 խաղ, որոնցում դարձել է 4 գոլի և 1 գոլային փոխանցման հեղինակ։

Կառլեն Հովհաննիսյանը հանդես է եկել նաև Հայաստանի Մ-16, Մ-17, Մ-19 և Մ-21 տարեկանների հավաքականներում։

Sportsworld.am-ը բարի վերադարձ և հաջող մրցելույթներ է մաղթում Կառլեն Հովհաննիսյանին։

Լուսանկարը` «ՓՅՈՒՆԻԿ» ՖԱ